 |
2004 թ-ի վերջում ՀՀ Տրանսպորտի և կապի նախարարությունը հաստատել էր Կապան-Մեղրի մայրուղու շինարարության ծրագիրը` Հայաստանի և Իրանի միջև տրանսպորտային և ուղևորային տեղաշարժերի ինտենսիվությունը բարձրացնելու նպատակով: Այն կոչված էր դառնալ այլընտրանքային տարբերակ միակ գոյություն ունեցող Կապան-Քաջարան-Մեղրի ճանապարհի համար, որն անցնում է Հայաստանի ամենաբարձր լեռնանցքով և վտանգավոր է վարորդների համար, հատկապես` ձմռանը: Ըստ նախնական պլանի, ճանապարհի 17 կմ տարածքը պետք է անցներ «Շիկահող» արգելոցի միջով, որն էլ անխուսափելիորեն կհանգեցներ արգելոցի գործնականորեն ամբողջ տարածքի ոչնչացմանը:
Տենդեր շահող` «Տրանսնախագիծ» ՓԲԸ-ն բախվեծ էկոլոգների և տեղի բնակչության բուռն դիմադրությանը: 2005 թ-ի մայիսի 3-ին ստեղծվեց «SOS Շիկահող» կոալիցիան, որը միավորեց ավելի քան 40 հանրապետական և միջազգային հասարակական և գիտական կազմակերպությունների արհեստավարժ էկոլոգներին և քաղաքացիներին: Բնության համաշխարհային հիմնադրամի հայաստանյան մասնաճյուղը (WWF) դիմեց միջազգային կազմակերպություններին, օրինակ, ՄԱԿ-ի զարգացման ծրագրին (UNDP), ՄԱԿ-ի շրջակա միջավայրի ծրագրին (UNEP) և Եվրոպայի անվտանգության և համագործակցության կազմակերպությանը (OSCE) այդ գոյապայքարում արգելոցին աջակցելու խնդրանքով: Հայկական էկոլոգիական ՀԿ-ների միությունը դիմել էր Նախագահին, Վարչապետին, Ազգային ժողովի Նախագահին և Գլխավոր դատախազին` պահանջելով դադարեցնել ճանապարհի շինարարությունը: Ամերիկայի Հայկական Համագումարը (AAA) բաց նամակ էր ուղարկել ՀՀ Նախագահ Ռոբերտ Քոչարյանին, իսկ Armenia Tree Project-ը (ATP) սփյուռքահայությանը կոչ էր արել իրենց կարծիքները փոխանցել Ռ. Քոչարյանին ԱՄՆ-ում ՀՀ-ի դեսպան Թաթուլ Մարգարյանի միջոցով: Շիկահողի իրավիճակի հետ կապված ՀՀ Բնապահպանության նախարար Վարդան Այվազյանի հետ հանդիպել էր Կրիտիկական էկոհամակարգերի համագործակցության հիմնադրամի (CEPF) տնօրեն Դեն Մարտինը (Dan Martin) և Կովկասում CEPF-ի ներկայացուցիչ Քրիստոֆեր Հոլցը (Christopher Holtz):
«SOS Շիկահող» կոալիցիայի միջոցառումները աջակցվում էին բազմաթիվ բողոքի ակցիաներով, հրատարակություններով և հեռուստատեսության ելույթներով:
Այդպիսի լուրջ ջանքերի արդյունքում 2005 թ-ի հունիսի 29-ին ՀՀ Կառավարությունը որոշում ընդունեց ճանապարհը անցկացնել ոչ թե արգելոցի միջով, այլ այն շրջանցելով: Սակայն, արդարացան թերահավատ էկոլոգների կանխատեսումները. քանի որ ճանապարհն ընկած է հիմնականում Մեղրու լեռնաշղթայի հյուսիսային լանջերին և շատ ոլորապտույտներով է, այն վարորդների, հատկապես` իրանական բեռնատարների վարորդների կողմից շատ քիչ է օգտագործվում:
Վեբ-կայքը ստեղծվել է 2009 թ. «Կենսաբազմազանության պահպանություն և համայնքային զարգացում. Հարավային Հայաստանում էկոտարածաշրջանի բնապահպանական պլանի նպատակների իրականացում» ծրագրի շրջանակներում: Ծրագիրն իրականացվել է WWF Նորվեգիայի և WWF Հայաստանի կողմից Նորվեգիայի կառավարության ֆինանսական աջակցությամբ:
© Shikahogh State Reserve
